AC唔掂定掛住個女？ 巴神輸到喊

那邊廂英超阿仙奴嘅雲格輸到仆，呢邊廂意大利嘅AC米蘭都唔好過，有巴洛迪利輸到喊。喺上周六意甲AC作客拿玻里輸1:3，巴神喺下半場被調離場後突流馬尿，係見隊波咁慘忍唔住，定有其他心事呢？
AC喺上月炒咗艾基利之後，由冇執教經驗嘅施多夫接任，喺佢領軍下頭兩場聯賽都贏晒，不過過程都相當驚險，到近排似乎終於露餡，主場賽和拖連奴後，上周六作客拿玻里就被對手技術性擊倒，新兵泰拉拔雖然喺8分鐘幫AC開紀錄，但主隊3分鐘後就由恩拿扳平；到下半場再由希古恩梅開二度奠定3:1勝局。

[b]施多夫：冇種族歧視[/b]
比賽去到73分鐘，當AC落後緊1:2嘅時候，施多夫將巴洛迪利調離場由柏仙尼入替。巴神坐低之後，一路用件大褸笠住個頭，隔咗陣凸番個頭出嚟已經淚流滿面；AC今季成日都輸㗎喇，到底發生咩事搞到要喊呢？
施多夫賽後都有講到巴神為咩喊，先否定咗係因為又受種族歧視：「佢係作為一個運動員而喊，其實佢都係人，喺比賽上出現呢啲情況其實唔出奇，大家可以向好嘅方向諗。」

[b]諗住入波送畀個女[/b]
原來巴洛迪利今次係歷來第4次隨隊作客聖保羅球場對拿玻里，無論係效力國米、曼城到AC都全部贏唔到。巴神喺最近終於肯認佢同前女友拉費娜所生個女皮雅，14個月大嘅皮雅，就係喺拿不勒斯呢頭長大，聽講巴神希望喺呢場波入番球獻畀囡囡，結果都係唔成功；定係巴神𠵱家多咗個負擔，又見到效力球隊越踢越唔對路，一諗到仲要留喺呢度至少多半季就一時感觸喊咗出嚟？
AC近況滑落，但對手拿玻里就有所回升，贏咗AC後結束意甲3場不勝。教練賓尼迪斯賽後大讚隊波，話佢哋今場波嘅表現集鬥志、速度同高質素於一身，終於踢番場似樣嘅波。

[img]http://static.apple.nextmedia.com/images/apple-photos/apple/20140210/large/10s3-501p.jpg[/img]
■希古恩（中）今場入兩粒，係拿玻里反勝功臣。路透社

[img]http://static.apple.nextmedia.com/images/apple-photos/apple/20140210/large/10s3-588p.jpg[/img]
■平時好man嘅巴神到底為咩喊呢？路透社


來源:蘋果日報網站